কালীকবচম্

ভৈরব উবাচ --
কালিকা য়া মহাবিদ্যা কথিতা ভুবি দুর্লভা ।
তথাপি হৃদয়ে শল্যমস্তি দেবি কৃপাং কুরু ॥ ১
কবচন্তু মহাদেবি কথয়স্বানুকম্পয়া ।
য়দি নো কথ্যতে মাতর্ব্বিমুঞ্চামি তদা তনুং ॥ ২


শ্রীদেব্যুবাচ -----
শঙ্কাপি জায়তে বত্স তব স্নেহাত্ প্রকাশিতং ।
ন বক্তব্যং ন দ্রষ্টব্যমতিগুহ্যতরং মহত্ ॥ ৩
কালিকা জগতাং মাতা শোকদুঃখবিনাশিনী ।
বিশেষতঃ কলিয়ুগে মহাপাতকহারিণী ॥ ৪
কালী মে পুরতঃ পাতু পৃষ্ঠতশ্চ কপালিনী ।
কুল্লা মে দক্ষিণে পাতু কুরুকুল্লা তথোত্তরে ॥ ৫
বিরোধিনী শিরঃ পাতু বিপ্রচিত্তা তু চক্ষুষী ।
উগ্রা মে নাসিকাং পাতু কর্ণৌ চোগ্রপ্রভা মতা ॥ ৬
বদনং পাতু মে দীপ্তা নীলা চ চিবুকং সদা ।
ঘনা গ্রীবাং সদা পাতু বলাকা বাহুয়ুগ্মকং ॥ ৭
মাত্রা পাতু করদ্বন্দ্বং বক্ষোমুদ্রা সদাবতু ।
মিতা পাতু স্তনদ্বন্দ্বং য়োনিমণ্ডলদেবতা ॥ ৮
ব্রাহ্মী মে জঠরং পাতু নাভিং নারায়ণী তথা ।
ঊরু মাহেশ্বরী নিত্যং চামুণ্ডা পাতু লিঞ্গকং ॥ ৯
কৌমারী চ কটীং পাতু তথৈব জানুয়ুগ্মকং ।
অপরাজিতা চ পাদৌ মে বারাহী পাতু চাঞ্গুলীন্ ॥ ১০
সন্ধিস্থানং নারসিংহী পত্রস্থা দেবতাবতু ।
রক্ষাহীনন্তু য়ত্স্থানং বর্জ্জিতং কবচেন তু ॥ ১১
তত্সর্ব্বং রক্ষ মে দেবি কালিকে ঘোরদক্ষিণে ।
ঊর্দ্ধমধস্তথা দিক্ষু পাতু দেবী স্বয়ং বপুঃ ॥ ১২
হিংস্রেভ্যঃ সর্ব্বদা পাতু সাধকঞ্চ জলাধিকাত্ ।
দক্ষিণাকালিকা দেবী ব্যপকত্বে সদাবতু ॥ ১৩
ইদং কবচমজ্ঞাত্বা য়ো জপেদ্দেবদক্ষিণাং ।
ন পূজাফলমাপ্নোতি বিঘ্নস্তস্য পদে পদে ॥ ১৪
কবচেনাবৃতো নিত্যং য়ত্র তত্রৈব গচ্ছতি ।
তত্র তত্রাভয়ং তস্য ন ক্ষোভং বিদ্যতে ক্বচিত্ ॥ ১৫

--------- কালীকুলসর্ব্বস্বে কালীকবচং সম্পূর্ণম্ .......

Written by: Prithish Gosh